Қазақстанның экс-президентінің немере інісі Қайрат Сатыбалды Алматыдағы Есентай өзенінің бойында орналасқан қонақүй ғимаратын мемлекет меншігіне өткізді. Бұл туралы Мемлекеттік мүлік және жекешелендіру департаменті «Власть» басылымының сұрауына берген жауабында мәлімдеді, деп хабарлайды Tarazy.kz
Ведомствоның дерегінше, нысан мемлекетке сыйға тарту шарты арқылы берілген.
Аталған ғимаратта Hyatt Hotels & Resorts қонақүйі 2017 жылы ашылуы тиіс болған, алайда жоба сол күйі іске қосылмады.
Қонақүй құрылысы кезінде Қастеев атындағы өнер музейі маңындағы жасыл аймақ пен экспонаттардың сақталуына қауіп бар деген алаңдаушылық айтылған. Соған қарамастан, құрылыс салушыда барлық қажетті рұқсат құжаттары болған.
Қайрат Сатыбалды 2022 жылғы наурызда ұсталып, сол жылдың қыркүйегінде «Қазақтелекомнан» қаражат жымқыру схемасын ұйымдастырды деген айыппен 6 жылға сотталған.
2024 жылғы 16 тамызда Өскемен қаласының №2 соты келтірілген шығын толық өтелгенін ескеріп, Сатыбалдының жазасын бас бостандығынан айырудан бостандықты шектеу түріне ауыстырды.
