Қырғызстанда Ұлттық қауіпсіздік мемлекеттік комитеті төрағасының бұрынғы орынбасары ұсталды, деп хабарлайды Tarazy.kz
24.kg басылымының күштік құрылымдардағы дереккөздеріне сүйенсек, 12 сәуірде Қырғызстан ҰҚМК төрағасының бұрынғы орынбасары Даниель Рысалиев қылмыстық іс аясында жауап алу үшін ІІМ-нің тергеу басқармасына жеткізілген. Ресми органдар әзірге істің нақты қай бап бойынша қозғалғанын және оның қандай мәртебеде өтіп жатқанын жариялаған жоқ.
Ал Kaktus.media мәліметінше, Рысалиевпен бірге Ыстықкөл облысындағы 6-басқарманың бұрынғы басшысы және ҰҚМК орталық аппаратының қазіргі қызметкері де ұсталған. Алдын ала деректер бойынша, олар кәсіпкердің шағымынан кейін «жемқорлық» бабы бойынша күдікке ілінген. Кәсіпкер өзіне заңсыз ақша талап етілгенін мәлімдеген.
Рысалиев 2025 жылдың желтоқсанынан бастап ҰҚМК төрағасының орынбасары қызметін атқарып, киберқауіпсіздік мәселелеріне жетекшілік еткен. Бұған дейін арнайы қызмет жүйесінде жұмыс істеп, өңірлік бөлімшелерді басқарған.
2026 жылдың ақпан айының басында кадрлық өзгерістер аясында қызметінен босатылған болатын.
