Сингапур премьер-министрі Лоуренс Вонгтың жылдық еңбекақысы 1,6 еседен астам өсіп, 3,6 млн сингапур долларына, яғни шамамен 2,85 млн АҚШ долларына жетеді. Бұған дейін ол жылына 2,2 млн сингапур долларын алып келген, деп хабарлайды Tarazy.kz
CNBC мәліметінше, бұл шешім елдегі министрлердің жалақысын көтеру аясында қабылданған. Сингапур билігі саяси қызметкерлердің еңбекақысын кейінгі 15 жылда алғаш рет қайта қарап отыр.
Премьер-министрдің жаңартылған табысы тұрақты және қызмет нәтижесіне байланысты өзгермелі төлемдерден құралады. Алайда Лоуренс Вонг алдағы бес жыл бойы жалақысына қосылған үстемеақының барлығын қайырымдылыққа жұмсауға уәде берді.
Жаңа есеп бойынша, төменгі деңгейдегі министрдің жылдық еңбекақысы 1,1 млн-нан 1,8 млн сингапур долларына дейін көтеріледі. Ал премьер-министрдің табысы осы көрсеткіштен екі есе жоғары болып белгіленген.
Сингапурда саясаткерлердің жалақысы жеке сектордағы табыспен салыстырыла есептеледі. Атап айтқанда, министрдің базалық еңбекақысы ең жоғары табыс табатын мың азаматтың медианалық кірісінен 40 пайызға төмен деңгейде бекітіледі.
15 қазаннан бастап қазіргі саяси лауазым иелеріне еңбек нәтижесі, атқаратын міндеті және жалақысының соңғы рет қашан өзгертілгені ескеріліп, 9 пайызға дейін біржолғы үстемеақы беріледі. Кейінгі өсім әр шенеуніктің жұмыс көрсеткішіне қарай кезең-кезеңімен жүзеге асырылады.
Сингапур билігінің түсіндіруінше, жоғары еңбекақы мемлекеттік қызметке бизнес, қаржы және өзге де табысы мол салаларда жұмыс істей алатын білікті мамандарды тартуға мүмкіндік береді.
Лоуренс Вонг әлемдегі ең жоғары жалақы алатын үкімет басшыларының бірі саналады. Салыстыру үшін, Швейцария президентінің жылдық табысы шамамен 600 мың, Австралия премьер-министрінікі 450 мың, ал АҚШ президентінікі 400 мың долларды құрайды.
