Тараз қаласында химия саласы қаладағы жалпы өнеркәсіп өндірісінің негізін құраушы болып табылады. Бұл саладағы «Казфосфат» ЖШС-нің Жаңажамбыл фосфор және минералды тыңайтқыштар зауытын қоса алғанда, жалпы 94 млрд. 931,8 млн. теңгенің өнімдерін өндірген немесе өткен жылдың есепті кезеңімен салыстырғанда 24 млрд. 157,2 млн. теңгеге артық өнім өндіріп отыр. Жалпы өнеркәсіптегі шығарылған өніміндегі олардың үлес салмағы 51,6 пайызды құрады, – деп хабарлайды Tarazy.kz.
Есепті кезеңде өнім көлемінің нақтылай көрсеткіші бойынша 1 млн. 3,1 мың тоннаға өнім өндіріліп, өткен жылмен салыстырғанда 196 мың тоннаға артып отыр. Оның ішінде, негізгі өнімдерін атап өтетін болсақ, майда таратылған фосфор 41,3 мың тонна, сары фосфор 7,9 мың тоннаға, аммофос 50,8 мың тоннаға артса, натрий триполифосфаты 2,9 мың тоннаға, фосфор қышқылы 3,3 мың тоннаға және азық трикальций фосфаты 6,5 мың тоннаға кеміген, фосфос калий тыңайтқышы өткен жылдың деңгейінде сақталған. Ал, күкірт қышқылын 2018 жылы өндірмесе ағымдағы жылдың есепті кезеңінде 108,7 мың тонна өндірген.
Айта кетейік, Тараз химия-технологиялық колледжінің базасында өңірдің химиялық кәсіпорындарына маман дайындайтын заманауи оқу орталығы ашылады. Бұл туралы Жамбыл облысы Кәсіпкерлер палатасының «Бірлескен химия өнеркәсібі» ЖШС, Kazakhstan Petrofac B.V, Жамбыл облысы әкімдігі, өңірдің химия саласы компаниялары («Қазфосфат» ЖШС, «ЕуроХим – Тыңайтқыш» ЖШС, «Talas Investment Company» ЖШС), колледждер мен БАҚ өкілдерімен кездесу барысында белгілі болды, – деп хабарлайды Ұлттық кәсіпкерлер палатасы.
Қазақстан Президенті Нұрсұлтан Назарбаевтың Қаулысына сай өңірдегі химия саласының жоғары даму әлеуетін ескере отырып Жамбыл облысы Шу ауданында «Тараз» химия паркі» еркін экономикалық аймағы құрылмақ. Онда әлемдік талаптарға жауап беретін химиялық өнім шығаратын 20 шақты жаңа өндіріс салынбақ.
Осыған орай химия саласының мамандарын дайындау мәселесі өте өзекті болып отыр.
«Облыстағы жеті колледж химия өнеркәсібінің 9 түрлі мамандықтарын оқытады. Қазіргі таңда колледждердегі 30 мың студенттің 1500-і химия саласы бойынша мамандық меңгеріп жатыр», – дейді Жамбыл облысы әкімінің орынбасары Ерқанат Манжуов.
Оның айтуынша, химия саласы мамандықтарының биылғы жылғы түлектерінің 60 пайыздан астамы жұмыспен қамтылған.
Биыл Таразда Мемлекет басшысының тапсырмасымен салынған 600 орындық Тараз химия-технологиялық колледжі пайдалануға берілді. Кездесу барысында аталмыш колледж базасында химия саласының мамандарын дайындайтын заманауи орталық құру туралы келісім жасалды.
«Жобаны қаржыландырумен аталмыш салаға – Kazakhstan Petrofac B.V. компаниясына кәсіби мамандарды тартқан «Бірлескен химия компаниясы» ЖШС «Самұрық» құзірет орталығы айналысатын болады. Олар 30 жылдан астам уақыт бойы әлем бойынша осындай орталықтар ашып жүр. Сингапурда да мұнай-химия саласының мамандарын дайындайтын орталық ашты», – делінген хабарламада.
«Самұрық» құзірет орталығы» ЖШС бас директоры Жангелді Сейітовтың айтуынша, орталықтың ашылуы жарты жылдан астам уақытты алады. Ғимаратта оқу корпустарынан бөлек тренингтер өткізуге арналған шағын зауыт пен төтенше жағдайлар кезінде студенттерге не істеу керектігін үйрететін орталықтар салынбақ.