Жамбыл облысы Қордай ауданында орын алған жағдайға байланысты бүгін Сортөбе ауылында брифинг өтті, – деп хабарлайды Tengrinews.kz тілшісі.
Онда ҚР премьер-министрінің орынбасары Бердібек Сапарбаев пен облыс әкімі Асқар Мырзахметов БАҚ өкілдеріне қақтығыс зардаптарын жою бойынша атқарылып жатқан жұмыстарды, бүгінгі күннің дәл осы сағаты бойынша түскен мәліметтерді баяндап, олардың жолдаған сауалдарына толыққанды жауаптар берді.
![](https://kaz.tengrinews.kz/userdata/u257/2020-02/resize/3f59481ffc5006af08740cec54449279.jpeg)
Бердібек Сапарбаев қазіргі таңда Қаракемер, Масаншы, Сортөбе, Қарасу, Ауқатты ауылдарының барлық кіріс-шығыстарына блог-постар қойылып, көшелерде қоғамдық тәртіпті сақтау жұмыстары жүргізіліп жатқандығын жеткізді. Сондай-ақ, соңғы тәулік ішінде Қордай, Қарасу, Ауқатты, Сортөбе шекара бақылап-өткізу бекеттерінен 4454 адам ҚР аумағына қайт оралғандығын айтты.
Облыс әкімі Асқар Мырзахметов қақтығыс салдарынан 36 тұрғын үй мен 11 кооммерциялық нысан және 44 автокөлік өртенгендігін тілге тиек етіп, алдын-ала жасалған есептеулер бойынша келтірілген залал көлемі анықталып жатқандығына назар аудартты.
Аймақ басшысының айтуынша, аталған ауылдарда зардап шеккен азаматтармен жұмыс жасау мақсатында арнайы топтар құрылып, мобильді халыққа қызмет көрсету орталықтары ұйымдастырылған. Ол арқылы өткен тәуліктің ішінде 22 азаматқа жеке куәлік, 17 азаматқа туу туралы куәліктер беріліп үлгерілген. Асқар Исабекұлы бүгінгі таңда көше бойындағы өртенген автокөліктерді, қоқыстарды тазалау жұмыстарын толық аяқталғанын, оған 30 техника мен 125 адам жұмылдырылғанын хабарлады.
![](https://kaz.tengrinews.kz/userdata/u257/2020-02/resize/eb412b8ad5b37ac395b0bc17b972f231.jpeg)
Сонымен қатар, барлық әлеуметтік нысандар, сауда орындары мен дәріханалар қалыпты жұмыс жасауда. Қазіргі уақытта жағдай тұрақталған.
Осыған дейін хабарлағанымыздай, ағымдағы жылдың 7-ші ақпан күні Қордай ауданындағы Қаракемер, Масаншы, Бұлар батыр ауылдарында болған қақтығыс нәтижесінде 176 адам ауруханаға жүгініп, 41-і жатқызылса, 10-ы қаза болды. Зардап шеккендерге барлығы 39 дәрігер көмек көрсетіп, қайтыс болғандардың отбасыларына көңіл айту, қол ұшын беру шаралары ұйымдастырылған. Үкіметтік комиссия мүшелері вице-премьер Б.Сапарбаев пен облыс басшысы А.Мырзахметов марқұмдардың жерлеу рәсіміне қатысып, ауыл тұрғындарымен кездесулер өткізді.
Қақтығыс болған күні төтенше жағдай департаментімен 19 техника, 80 адам жұмылдырылған. Ал жағдайды бақылау үшін барлығы 1968 құқық қорғау органдарының қызметкерлері, 130-ға жуық әскери техника жұмылдырылды.
![](https://kaz.tengrinews.kz/userdata/u257/2020-02/resize/3296be11dd50f1e650fad0f590230ad3.jpeg)
Айта кетейік, аймақ басшысы Асқар Исабекұлы оқиға орын алған күннен бастап аталған ауылдарға арнайы барып, жағдайды өз бақылауына алған болатын. Тұрғындармен кездесіп, сабырға шақырып, тараптардың пікірлеріне құлақ түріп жүрген аймақ басшысы барлық қалпына келтіру шаралары сапалы әрі шұғыл атқарылуына көңіл бөлуде.