Таяу Шығыстағы шиеленіс әлемдік мұнай нарығындағы тұрақсыздықты күшейткен. Алайда Қазақстанның республикалық бюджетіне негізгі әсер еткен фактор — теңге бағамы. Бұл туралы қаржы министрі Мәди Такиев мәлімдеді, деп хабарлайды Tarazy.kz.
Министрдің айтуынша, есепті тоқсанда бюджет кірісіне сыртқы макроэкономикалық жағдайлар айтарлықтай ықпал еткен. Осы кезеңде мұнайдың орташа бағасы барреліне 80,6 доллар деңгейінде қалыптасқан.
Сонымен қатар, мұнай бағасы өсуінен түскен қосымша табыстың басым бөлігі тікелей бюджетке түспейді. Қолданыстағы жүйеге сай негізгі мұнай кірістері Ұлттық қорға жинақталады.
Қаржы министрінің сөзінше, бюджетке оң әсер көбіне мұнай экспорттық кедендік бажы арқылы байқалған. Бұл бағытта қосымша 40,5 млрд теңге түскен.
Алайда теңгенің нығаюы керісінше кірісті тежеген. Есепті кезеңде орташа бағам 497,7 теңге деңгейінде қалыптасып, болжанған 540 теңгеден төмен болған. Соның салдарынан бюджетке шамамен 146 млрд теңге кем түскен.
Министр бұл айырмашылықты бюджет кірісін шектеген негізгі фактор ретінде атады.
Сонымен бірге, салық және кедендік әкімшілендіруді жетілдіру нәтижесінде қосымша 137,6 млрд теңге қамтамасыз етілген.
