Жасанды интеллект мемлекеттік сатып алудағы жемқорлықты толық жоя алмайды. Арнайы зерттеу жүргізген мамандар осындай қорытынды жасады, деп хабарлайды Tarazy.kz.
Сарапшылар Даниядағы 2016–2022 жылдар аралығындағы 21 мыңға жуық сатып алу деректерін талдап, бірнеше маңызды қорытынды жасаған.
Біріншіден, басты фактор – деректер сапасы. Жасанды интеллект алгоритмдері деректерге тәуелді, сондықтан әлсіз немесе толық емес мәліметтер дұрыс нәтиже бермейді.
Екіншіден, компания иелері туралы ашық реестрлердің болуы маңызды. Мұндай деректер бұзушылықтарды анықтауға көмектеседі. Алайда Қазақстанда бұл ақпарат толық әрі өзекті түрде қолжетімді емес.
Үшіншіден, алгоритмдер жемқорлықты тек «аномалия» ретінде анықтайды. Яғни жүйе жалпы деректермен салыстырып, ауытқуды байқаса ғана күмән тудырады. Егер белгілі бір заңбұзушылықтар жүйеде қалыпты жағдайға айналса, жасанды интеллект оны проблема ретінде көрмеуі мүмкін.
Сондықтан басқа елдердің дайын алгоритмдерін пайдалану тиімсіз. Әр елдің деректер базасы мен «қалыпты» көрсеткіштері әртүрлі.
Сарапшылардың пікірінше, қазіргі жағдайда жасанды интеллект бақылаушы органдардың жұмысын толық алмастыра алмайды. Жүйені тиімді ету үшін ең алдымен сапалы деректер жинау мен ашықтықты қамтамасыз ету қажет.
