Алматы облысында 15 жастағы жетім қызға қатысты ауыр қылмыс дерегі тіркелді, деп хабарлайды Tarazy.kz Еуразия бірінші арнасына сілтеп.
Алдын ала мәлімет бойынша сегіз күдікті екі ай бойы жасөспірімді қорқытып, зорлық көрсеткен. Телеарна мәліметінше, олардың екеуі ауыл мұғалімдерінің балалары екені айтылып жатыр.
Жәбірленуші қысым мен бопсалауға байланысты бұл туралы жақындарына айта алмаған. Күдіктілер түрлі бейнежазбаларды жариялаймыз деп қорқытқан.
Оқиға туралы қыздың отбасына мектеп директоры хабарлаған. Кейін бірден прокуратураға арыз түсірілген.
Қазір бұл іс бойынша тергеу амалдары жүргізіліп жатыр. Күдіктілер қайда екені және олардың жауапкершілікке тартылуы бойынша ресми органдарға сұрау салдық. Алматы облыстық полиция департаменті екі күдіктіні ұстапты. Қоғамда үлкен шу тудырып, елді елең еткізген іспен Райымбек аудандық емес облыстық полиция айналысады.
Күдіктілер тобын анықтадық. Әзірге екеуі ұсталып, изоляторға қамалды. Өзге күдіктілерге байланысты тергеу амалдары жүріп жатыр. Облыстық полиция басшысының тапсырмасына сай жедел тергеу тобы құрылды. Ол топ оқиғаның толық мән-жайын анықтауда, — деп жауап берді Алматы облыстық полициясы.
