Кеше Шымкент әкімі Ғабит Сыздықбеков Орталық коммуникациялар қызметі алаңында баспасөз конференциясын өткізіп, БАҚ өкілдерінің сауалына жауап берді. Сұрақ-жауап барысында әкімді асыра мақтаған блогер Бақытжан Көпбаев жұрттың сынына қалды, деп хабарлайды Tarazy.kz
Блогер көпшіліктің ойында «әкім басқа жаққа ауысып кете ме?» деген қорқыныш бар екенін айтты.
«Ғабеке, Шымкент қаламыз сіз келгенге дейін бір үлкен ауыл сияқты дамып бара жатқан. Мегаполис дегенге ұялатын едік. Қазір сіз келгелі бері қала дамыған, шетелдегі мегаполистер сияқты өзгеріс барына қатты қуанып жатырмыз. Тұрғындардың уайымы қаламызды сондай көркейтіп, еңбек сіңіріп келе жатқан әкіміміз ертең басқа жаққа кетіп қалып, біз жетімсіреп қалмаймыз ба деп қорқады», — деді блогер.
Шымкент әкімі бұл мәселені тек Президент шешетінін айтты.
«Маған дейінгі әріптестерім де барын салып қызмет еткен. Әрине, оларға бағаны халық береді. Қаншалық жұмыс істеп-жұмыс істемейтінімізді Президентіміз шешеді. Қанша болсам — сонша еңбек ете береміз», — деді әкім.
«Аллаға және Президентке рақмет, сізді бізге әкім қылып сайлаған», — деп жауап берді блогер бұған.
Бұл жайт желіде қызу талқыланып жатыр: «Не деген сөздер-ай! Ұялып кетесің ғой», «Алдын ала дайындалған», «Жағымпаз».
