Алматы облысында “Батыс Еуропа – Батыс Қытай” халықаралық көлік дәлізінің соңғы кезеңі болып табылатын «Ұзынағаш – Отар» (101–143 км) учаскесі ашылды, деп хабарлайды Tarazy ақпарат.
Бұл — тек жол құрылысын аяқтау ғана емес, Жамбыл ауданы мен жалпы өңірдің әлеуметтік-экономикалық дамуына жаңа серпін беретін маңызды дәліз. Ұзындығы 42 шақырым болатын учаскенің құрылысы 2024–2025 жылдары жүзеге асырылды. Бас мердігер — KLV Insaat Anonim Sirketi, техникалық қадағалаушы — Donsung Engineering компаниясы. Құрылыста 1,3 млн текше метр жер төсемі, 42 км қосымша ПГС қабаты, барлық жол қабаттары салынды. Мосттар мен су өткізу құрылыстары толық аяқталды. Жобада 163 техника бірлігі, 290 маман, 2 асфальт-бетон зауыты жұмыс істеді.
Қазіргі таңда жол бойындағы қозғалыс төрт жолақты бағытта толық ашылды. Соңғы кезеңдегі жұмыстар — жол белгілерін орнату, барьерлік қоршаулар мен жол сызықтарын салу — аяқталуға жақын.
Жаңа жол — өңірдің инвестициялық әлеуетін арттырып, туризм мен кәсіпкерліктің дамуына, ауыл шаруашылығы өнімдерін тасымалдау логистикасын жақсартуға зор мүмкіндік береді. Бұл күре жол өңір экономикасына айтарлықтай оң өзгеріс әкеледі.
Ашылу рәсімінен кейін алғашқы автопробег өтіп, жол пайдалануға ресми түрде берілді.