Алматыда Іле Алатау мемлекеттік ұлттық табиғи паркінің аумағында «Бақыт соқпақтары» жобасы аясында жаңа абаттандырылған тау маршруты ашылады. Бұл бағыт Проходное шатқалы арқылы Терра алаңқайы мен Алёшкин көпіріне дейін созылады. Бұл — Іле Алатауының ең көрікті және танымал жаяу серуен жолдарының бірі.
Жаңа маршруттың ұзындығы – 13,5 шақырым, биіктік айырмасы – шамамен 1580 метр. Соңғы нүктесі – теңіз деңгейінен 3330 метр биіктікте орналасқан Космостанция. Жол бойында орналасқан Алёшкин көпірі — Қазақстандағы ең биік таулы аспалы көпірлердің бірі. Оның ұзындығы 50 метр, ал теңіз деңгейінен биіктігі – 3000 метрден асады.
Бұл бағыт Іле Алатау мемлекеттік ұлттық табиғи паркінің туризм әлеуетін арттыруға бағытталған. Маршрут бойында екі Ecodomeo экодәретханасы, үш шале-беседка, 14 орындық, 80 метр қорғаныш тұтқалары, алты бағыттаушы мен төрт ақпараттық стенд орнатылған. Жобаның үшінші кезеңіне 106 миллион теңге инвестиция құйылды.
2019 жылдан бері «Бақыт соқпақтары» жобасы аясында ұлттық парк аумағында 27 шақырым соқпақ абаттандырылып, бес жаңа маршрут ашылды. Сонымен қатар, 10 беседка, 56 орындық, 30 бағыттаушы көрсеткіш, 600 метрлік баспалдақ пен тұтқа, 14 ақпараттық панель орнатылды. Жалпы инвестиция көлемі 360 миллион теңгені немесе шамамен 1 миллион АҚШ долларын құрайды.
2028 жылға дейінгі жоспарларға сәйкес:
- 2026 жылы – Іле Алатауының Бутаков шатқалында ұзындығы 17 км болатын төрт маршрут абаттандырылады;
- 2027 жылы – «Жапон жолы – экобекет» бағытында (11 км) жұмыстар басталады.
Барлық бағыттарда қауіпсіздік пен жайлылық ескерілген – бағыттаушылар, беседкалар, орындықтар, жол бойындағы белгілер орнатылады. Алдағы кезеңдерге бөлінетін инвестиция көлемі 335 миллион теңгеден асады.
Сонымен қатар, цифрлық навигация мен қауіпсіздік жүйесі әзірленуде: онлайн-карталар, маршруттарды тіркеу, ТЖД-ға автоматты хабарлама беру және қауіпсіздік бойынша кеңестер қарастырылған. Бұл жүйе кейін Алматы әкімдігіне беріледі. Цифрлық инфрақұрылымға 100 миллион теңге бөлінген.
Іле Алатау мемлекеттік ұлттық табиғи паркінде соңғы бес жылда 260-тан астам құтқару операциясы жүргізілген. Сол себепті қауіпсіздікті күшейту жобаның басты мақсатының бірі болып отыр. Маршруттарды жабдықтауға 150-ден астам қызметкер тікелей қатысып, көпірге Қазақстан туын көтеріп шықты.
«Бақыт соқпақтары» — Алматы мен Іле Алатауындағы табиғатты сүйетіндер үшін қауіпсіз, экологиялық таза және қолжетімді демалыс мәдениетін дамытудың маңызды қадамы.
